Qafqazşünaslıq İnstitutunda Ulu öndər Heydər Əliyevin anım gününə həsr olunmuş dəyirmi masa və kitabların təqdimatı keçirilib
Azərbaycan Respublikası Prezidenti İlham Əliyevin Azərbaycan Respublikasında 2023-cü ilin “Heydər Əliyev İli” elan edilməsi haqqında” 29 sentyabr 2022-ci il tarixli Sərəncamı ilə əlaqədar olaraq AMEA Qafqazşünaslıq İnstitutunda Ulu öndər Heydər Əliyevin anım gününə həsr olunmuş dəyirmi masa və nəşr olunmuş kitabların təqdimat mərasimi keçirilib. Öncə Ümummilli Lider Heydər Əliyevin əziz xatirəsi bir dəqiqəlik sükutla yad olunub. Toplantını giriş sözü ilə institutun direktoru AMEA-nın müxbir üzvü, professor Musa Qasımlı açıb. Bildirib ki, Ulu Öndər Heydər Əliyev ilində üç kitab və bir konfrans materialı çap edilib. AMEA-nın müxbir üzvü, professor Musa Qasımlı, tarix üzrə fəlsəfə doktoru, dosent Elnur Kəlbizadə, tarix üzrə fəlsəfə doktoru Günel Musayeva, siyasi elmlər üzrə fəlsəfə doktoru Samirə Həbibbəylinin birgə yazdıqları “Heydər Əliyev və Qafqaz problemləri” adlı əsərdə ilk dəfə olaraq Ulu öndər Heydər Əliyevin Qafqaz problemlərinə münasibəti və fəaliyyəti müxtəlif dillərdə olan mötəbər mənbə və ədəbiyyatlar əsasında tədqiq edilib. Kitabda Heydər Əliyevin çıxışları, nitqləri və müsahibələrinin toplandığı “Müstəqilliyimiz əbədidir” çoxcildliyi əsasında Qafqaz məsələlərinə baxışları, Ermənistanın Azərbaycana qarşı hərbi təcavüzü nəticəsində yaradılmış Dağlıq Qarabağ münaqişəsi, həmçinin Çeçenistan, osetin-inquş, gürcü-abxaz, Tsxinvali (gürcü-osetin) münaqişələrinin dinc siyasi vasitələrlə tənzimlənməsi, Azərbaycan Respublikasının Rusiya, Gürcüstan, Türkiyə və İranla münasibətlərinin inkişaf etdirilməsində fəaliyyətləri təhlil olunub. Belə bir nəticəyə gəlinib ki, Ulu öndər Heydər Əliyev Qafqaz regionunun sülh zonasına çevrilməsindən ötrü geniş fəaliyyət göstərib. Bunun üçün ilk növbədə dövlətlərin bir-birinin daxili işlərinə son qoymasının, münaqişələrin dayandırılmasının tərəfdarı olub və bir sıra təşəbbüslər irəli sürüb. Hesab edib ki, münaqişələr həll edildikdən sonra Qafqaz ölkələri və xalqları həm ikitərəfli, həm də çoxtərəfli formatda əməkdaşlıq edə bilərlər. Kitab regionşünaslar, politoloqlar, tarixçilər, diplomatlar, siyasətçilər, tələbələr, magistrlar, həmçinin Ulu öndər Heydər Əliyevin siyasi və dövlətçilik fəaliyyəti ilə maraqlanan geniş oxucu kütləsi üçün nəzərdə tutulub. Kitabın elmi redaktoru AMEA-nın həqiqi üzvü, tarix elmləri doktoru, professor İsmayıl Hacıyev, rəyçilər siyasi elmlər doktoru Hikmət Babaoğlu, tarix elmləri doktoru, professor Qasım Hacıyev, siyasi elmlər doktoru, professor Ramiz Sevdimalıyev, tarix elmləri doktoru, professor Şirxan Səlimovdur. Tarix elmləri doktoru, professor Qasım Hacıyevin yazdığı “Heydər Əliyev və Azərbaycan Respublikasının ərazi bütövlüyü” adlı kitabda dünya şöhrətli dahi siyasi xadim, dövlətçilik tariximizdə mühüm mövqe tutan, tarixin ahəngini öz nəzarəti altına götürə bilən, realist və praqmatik, inamlı xarici siyasət yürüdə bilən böyük şəxsiyyət Heydər Əliyevin Ermənistanın əsassız ərazi iddialarına, hərbi təcavüzünə, erməni separatizminə qarşı, Azərbaycan Respublikasının ərazi bütövlüyünün təmin olunması uğrunda fəaliyyəti araşdırılıb. Kitabın elmi məsləhətçi AMEA-nın prezidenti, akademik İsa Həbibəyli, elmi redaktoru isə AMEA-nın həqiqi üzvü, tarix elmləri doktoru, professor İsmayıl Hacıyev, rəyçiləri tarix elmləri doktoru, professor İradə Hüseynova, tarix elmləri doktoru, professor Kərim Şükürovdur. Tarix üzrə fəlsəfə doktoru Günel Musayevanın rus dilində nəşr olunmuş “Böyük Britaniyanın Azərbaycan siyasətində neft amili (1991-2022-ci illər)” adlı monoqrafiyasında ilk dəfə olaraq Böyük Britaniyanın Azərbaycan siyasətində neft amili müxtəlif dillərdə olan mənbə və ədəbiyyatlar əsasında tədqiq edilib. Monoqrafiyada 1991-2022-ci illərdə Böyük Britaniyanın Azərbaycan siyasətində neft amilinin yeri və rolu araşdırılıb, Ermənistanın hərbi təcavüzünə və 44 günlük Vətən Müharibəsi nəticəsində ərazilərin azad edilməsi məsələsində Böyük Britaniya hökumətinin mövqeyi şərh, təhlil və müqayisəli təhlil edilib. Kitabın elmi redaktoru AMEA-nın müxbir üzvü, tarix elmləri doktoru, professor Musa Qasımlı, rəyçilər AMEA-nın həqiqi üzvü, tarix elmləri doktoru, professor İsmayıl Hacıyev, tarix elmləri doktoru, professor Şirxan Səlimov, tarix üzrə fəlsəfə doktoru, dosent Əfşan Şəfiyevadır. İnstitutun üç dildə nəşr edilən “Qafqazşünaslıq” jurnalında Ulu öndər Heydər Əliyevə həsr olunmuş məqalə yer alıb. Dəyirmi masada “Heydər Əliyev: Qafqazda sülh və əməkdaşlıq məsələləri” adlı respublika elmi konfransının çap olunmuş materiaları da təqdim olunub. Ölkə səviyyəli olmasına baxmayaraq konfransda xarici ölkələrdən də tədqiqatçılar məruzə ediblər. Tədbirdə çıxış edən AMEA Fəlsəfə və Sosiologiya İnstitutunun icraçı direktoru, tarix elmləri doktoru Eynulla Mədətli, AMEA A.A.Bakixanov adına Tarix İnstitutunun Əliyevşünaslıq şöbəsinin müdiri, tarix elmləri doktoru Ədalət Qasımov, tarix üzrə fəlsəfə doktoru, dosent Əfşan Şəfiyeva, UNEC-in tədqiqatçısı Həmid Əhmədli, Qafqazşünaslıq institutun elmi işlər üzrə direktor müavini, s.e.d., dosent Ramilə Dadaşova, şöbə müdirləri t.e.d., professor Qasım Hacıyev, f.ü.f.d., dosent Vahid Ömərov, t.ü.f.d., dosent Elnur Kəlbizadə, t.ü.f.d. Günel Musayeva, s.e.ü.f.d. Samirə Həbibbəyli kitablarla bağlı fikirlərini bölüşüb, Azərbaycan elmi üçün dəyərli və böyük tövhə olduğunu bildiriblər.
